सुकुम्बासी समस्या र खानेपानी व्यवस्थापन पहिलो प्राथमिकता : पौडेल

रूपन्देही, फागुन ११। रूपन्देही निर्वाचन क्षेत्र नम्बर २ बाट प्रतिनिधिसभा सदस्यका लागि नेपाली कांग्रेसका उम्मेदवार चुन्नप्रसाद पौडेल ले बुटवल क्षेत्रका सुकुम्बासी समस्या तथा खानेपानी व्यवस्थापनलाई आफ्नो पहिलो प्राथमिकतामा राख्ने बताएका छन्। सोमबार तिलोत्तमा नगरपालिका वडा नम्बर ३ मा आयोजित घरदैलो कार्यक्रममा बोल्दै उनले दीर्घकालीन र व्यवहारिक समाधानका लागि संसदमा सशक्त आवाज उठाउने प्रतिबद्धता जनाए।
घरदैलोका क्रममा बोल्दै पौडेलले वर्षौंदेखि बसोबास गर्दै आएका वास्तविक सुकुम्बासी नागरिक अझै पनि जग्गाको लालपुर्जाविहीन अवस्थामा बस्न बाध्य रहेको उल्लेख गरे। “सुकुम्बासी समस्या मानवीय संवेदनासँग जोडिएको विषय हो, यसलाई ढिलाइ नगरी कानुनी प्रक्रियामार्फत समाधान गर्नुपर्छ,” उनले भने, “निर्वाचित भएलगत्तै यस विषयलाई प्राथमिक एजेन्डा बनाएर संसदमा पहल गर्छु।” उनले सुकुम्बासीको पहिचान, तथ्यांक संकलन र व्यवस्थित बसोबासका लागि एकीकृत योजना आवश्यक रहेको बताए।
पौडेलले बुटवल तथा आसपासका क्षेत्रमा तीव्र सहरीकरणका कारण खानेपानी समस्या जटिल बन्दै गएको उल्लेख गरे। “जनसंख्या वृद्धि र अव्यवस्थित विस्तारका कारण पानीको स्रोतमा दबाब बढेको छ,” उनले भने, “स्थायी समाधानका लागि स्रोत संरक्षण, नयाँ आयोजना विस्तार र वितरण प्रणाली सुधार अपरिहार्य छ।” संघ, प्रदेश र स्थानीय तहबीच समन्वय गरेर प्रभावकारी योजना कार्यान्वयन गरिने उनको भनाइ थियो।
कार्यक्रममा सहभागी प्रजापाल गिरीले रूपन्देही क्षेत्र नम्बर २ औद्योगिक तथा पर्यटकीय सम्भावना बोकेको क्षेत्र भएकाले व्यवस्थित सहरी विकासमा विशेष ध्यान दिनुपर्ने बताए। “उद्योग र पर्यटन विस्तार भइरहेका बेला नागरिकलाई बस्न योग्य वातावरण तयार पार्नु राज्यको दायित्व हो,” उनले भने, “पूर्वाधार, सरसफाइ, सडक र खानेपानी जस्ता आधारभूत सेवामा लगानी बढाउनुपर्छ।”
त्यस्तै मुक्ति राज पौडेलले विगतका निर्वाचनमा गरिएका आश्वासन पूरा नभएकाले नागरिक निराश बनेको उल्लेख गरे। “खोक्रा भाषणले मात्रै विकास हुँदैन, परिणाममुखी काम आवश्यक छ,” उनले भने, “यसपटक शिक्षा, स्वास्थ्य र रोजगारीलाई प्राथमिकता दिने नेतृत्व चयन हुनुपर्छ।” उनले युवालाई रोजगारी सिर्जना, सीपमूलक तालिम र उद्यम प्रवर्द्धनमार्फत आत्मनिर्भर बनाउने नीति आवश्यक रहेको धारणा राखे।
घरदैलो कार्यक्रममा स्थानीय बासिन्दाले सुकुम्बासी समस्या, खानेपानी अभाव, सडक स्तरोन्नति, ढल निकास व्यवस्थापन र रोजगार अवसरको कमीबारे गुनासा राखेका थिए। उनीहरूले दीर्घकालीन समाधानसहित स्पष्ट कार्ययोजना सार्वजनिक गर्न उम्मेदवारसँग आग्रह गरेका थिए। कार्यक्रममा विभिन्न सामाजिक अगुवा, व्यवसायी, युवा तथा महिलाको उल्लेखनीय सहभागिता रहेको थियो।
पौडेलले आफू निर्वाचित भएमा क्षेत्रको समग्र विकासलाई प्राथमिकतामा राख्दै पारदर्शी र उत्तरदायी ढंगले काम गर्ने प्रतिबद्धता दोहोर्‍याए। “जनताको विश्वास नै मेरो बल हो,” उनले भने, “यहाँका समस्या समाधानका लागि निरन्तर पहल गर्नेछु।”
रूपन्देही क्षेत्र नम्बर २ मा औद्योगिक विस्तार, शहरीकरण र जनसंख्या वृद्धिसँगै आधारभूत सेवाको माग तीव्र बन्दै गएको छ। यस्ता चुनौतीका बीच सुकुम्बासी व्यवस्थापन र खानेपानी समस्या यसपटकको निर्वाचनको केन्द्रीय मुद्दाका रूपमा उभिएको छ। उम्मेदवारहरू मतदातासँग प्रत्यक्ष भेटघाट गर्दै आफ्ना एजेन्डा सार्वजनिक गरिरहेका छन् भने नागरिक पनि ठोस योजना र कार्यान्वयन क्षमताका आधारमा नेतृत्व चयन गर्ने तयारीमा देखिएका छन्।