लिफ्टिङ्गले खानेपानी सहज

अनिल खत्री

गुल्मी, ७ पुस ।

स्थानीयले कहिल्यै पानी आउला र घरमै बसीबसी पानी पिउन पाउँला भन्ने कल्पना समेत गरेका थिएनन् । नजिकै मुहानहरु पनि नभएकाले र अग्लो स्थानमा रहेकाले पानी ल्याउन समेत कठिन अवस्थामा रहेको गुल्मीको इस्मा गाउँपालिका वडानम्बर–१ स्थित उजुङ्गमा स्थानीयले कल्पना गरेभन्दा फरक भएको छ । सदियौंदेखि खानेपानीको लागि समस्यामा रहेका उजुङ्गमाबासीको पानीको समस्या समधान भएको छ । सोही वडाकै दुनदुरे खोलाबाट लिफ्टिङ्ग मार्फत पानी तानेर अग्लो स्थानमा पुगेपछि स्थानीएको पानीको समस्या समधान भएको हो ।

यसअघि यहाँका एक सय ४७ घर परिवारको पानी खोज्दैमा दैनिकी बित्ने गर्दथ्यो । दैनिक ३ देखि ४ गार्गी पानीको लागि टाढा पुगेर लाइन बसेर बोक्नु पर्दा यहाँका स्थानीयलाई दैनिकी चलाउन निकै कठिन थियो । नजिकै भएका मुहानहरु सुकेपछि टाढाटाढा पानीलिनजना उनीहरु बाध्य थिए । पानी अभावकै कारण यहाँबाट बसाई सर्ने क्रम पनि बढेको थियो । पानी बोक्नुुपर्ने कारण पनि यहाँ अन्यत्रबाट छोरी दिन समेत आनाकनी गर्ने गरेको स्थानीय बताउँथे । तर, यो सबै समस्याको समधान लिफ्टिङ्ग खानेपानीले गरिदिएको छ । ०७० सालबाट सुरु गरिएको दुनदुरे खोला उजुङ्ग हर्पुकोट खानेपानी ५ वर्ष पछि निर्माणको काम सम्पन्न भएको हो ।

नेपाल सरकारबाट ३ करोड ६९ लाखमा सम्पन्न खानेपानी आयोजनाले पानी तान्न सुरु गरेपछि स्थानीयले खुसी व्यक्त गरेको दुनदुरे खोला उजुङ्ग हर्पुकोट खानेपानी समितिका सचिव नारायण कुँवरले बताए । तत्कालको लागि अस्थायी रुपमा पानी बितरण भएको छ, उपभोक्ता समिति सचिव कुँवरले भने, ‘केही दिनमै घरघरमा लगेर बितरण कार्य सुरु गरिनेछ ।’ हाल २ सय २७ घरले खानेपानी पिउनका लागि सदस्य बनेको सचिव कुँवरले बताए । पानी पिउनका लागि प्रतिव्यक्ति ३ हजार ५५ रुपैयाँ लाग्ने समितिका अध्यक्ष बैकुण्ठ कुँवरले बताए । हालको लागि केही घरहरुले पानीको उपभोग गरिरहे तापनि एक घर एक धारा अनुसार मिटर सिस्टमले बितरण गरिने अध्यक्ष कुँवरले बताए । करिब ७ सय घरलाई पुग्ने लिफ्ट गरिएको खोनपानी ९ सय ५० मिटर तलबाट माथि ल्याइएको हो ।

खानेपानी उजुङ्ग, हर्पुकोट, हस्तीचौर, तोरिखर्क र फेदियसम्मका स्थानीयले माग गरेको समितिका सचिव कुँवरले बताए । कल्पना समेत नगरेको ठाउँमा पानी आउँदा निकै खुसी भएको स्थानिय अर्जुन कुँवरले बताए । पानी बोकेर स्कुल जाँदा बिद्यार्थीहरुलाई पनि निकै समस्या थियो सचिव कुँवरले भने, ‘स्थानीय निकै खुसी भएका छन् । अब उनीहरुको दैनिकीमा परिर्वतन आउनेछ ।’ पानी बोकेरै दैनिकी बिताउनु पर्ने स्थानीयले अब त्यो समयलाई अन्य आयआर्जन र अरु काममा लगाउने उनको भनाई छ ।

Facebook Comments