भैरहवा– जिल्ला प्रहरी कार्यालय रुपन्देही तथा मातहतबाट खटिएको प्रहरी टोलीले बिभिन्न स्थानहरुमा चेकजाँच गर्ने क्रममा अबैध रुपमा भन्सार छली चोरी पैठारी गरेको लाखौं मूल्यको सामान बरामद गरेको छ । जिल्ला प्रहरी, रुपन्देहीका सूचना अधिकृत सुरज कार्कीका अनुसार विभिन्न स्थानबाट ११ लाख १२९ रुपैयाँ बराबरको सामानहरु बरामद गरिएको हो ।
इलाका प्रहरी कार्यालय, बेलहियाबाट खटिएको प्रहरी टोलीले सिद्धार्थनगर–१, बाइपासबाट लेडिज सुट २० थान, भित्री बस्त्र कपडा १६८ पिस र प्लास्टिक स्ट्यान्ड १८० थान गरि ९० हजार बराबरको सामान बरामद गरेको छ ।
इलाका प्रहरी कार्यालय बेथरीबाट खटिएको प्रहरी टोलीले मायादेवी–६, गुरबनियाबाट लु ६१ प ९१६९, लु ३१ प ५५५९, लु ४२ प ५८६० र लु २३ प ८८१९ नम्बरको मोटरसाइकलमा ल्याउँदै गरेको बेवारिसे अवस्थामा राखेको चिनी ६ बोरा, सुकेको खुर्सानी ७ बोरा, धनिया ५ बोरा, जिमा मल ४ बाल्टी र मोटरसाइकलसहित २ लाख ६८ हजार बराबरको सामान बरामद गरेको डीएसपी कार्कीले जनाए ।
प्रहरी चौकी पिप्रहवाबाट खटिएको टोलीले रोहिणी–५, तरकुल्ला स्थितबाट बोइलर कुखुरा १५ गोटा १६ हजार बराबरको बरामद बरामद गरेको छ । यसैगरी प्रहरी चौकी, मेउडिहवाबाट खटिएको टोलीले सिद्धार्थनगर–२, झण्डिबजारबाट प्याज ४५० केजी करिब २७ हजार बराबरको नियन्त्रणमा लिएको छ ।
यता प्रहरी चौकी कालिदहबाट खटिएको टोलीले लुम्बिनी सांस्कृतिक नगरपालिका वडा नं. १ र १३ कालिदहबाट युपी ५५ एएफ ५५८९ नम्बरको मोटरसाइकल, ४ वटा पाडा र १ वटा पाडी, डिएपि–युरिया मल ८ बोरा, किराना तथा खुद्रा सामान गरी मोटरसाइकलसहित १ लाख ९७ हजार ६९० रुपैयाँ बराबरको सामान बरामद तथा पाडाहरु नियन्त्रणमा लिएको छ ।
