काठमाडौं ।
नेपाल सन् २०२५ का लागि एकल साहसिक यात्राको सातौं उत्कृष्ट गन्तव्यका रूपमा सूचीकृत भएको छ। बेलायतस्थित साहसिक पर्यटन कम्पनी ‘मच बेटर एड्भेन्चर्स’ द्वारा सार्वजनिक सूचीमा नेपाल सातौं स्थानमा परेको हो।
नेपालको यो उपलब्धिमा भू–दृश्यको अनौठो सौन्दर्य, सांस्कृतिक विविधता, बजेटमैत्री सेवा, र रोमाञ्चक साहसिक क्रियाकलापको भूमिकालाई मुख्य मानिएको छ। एभरेष्ट बेसक्याम्प ट्रेक, अन्नपूर्ण सर्किट ट्रेक, चितवन निकुञ्जको जंगल सफारीजस्ता गतिविधिले नेपाललाई आत्मिक शान्ति खोज्ने र साहसिकता प्रेमी एकल पर्यटकहरूका लागि लोकप्रिय गन्तव्य बनाएको छ।
नेपाल पर्यटन बोर्डले देशको साहसिक, प्राकृतिक र सांस्कृतिक पक्षलाई प्रभावकारी रूपमा प्रस्तुत गर्दै आएको बताउँदै उत्तरदायी पर्यटन नीतिको सफलताका कारण एकल यात्रुहरूका लागि नेपाल सुरक्षित र भरपर्दो गन्तव्य बन्न सफल भएको दाबी गरेको छ।
पर्यटन बोर्डका अनुसार, स्थानीय गाइडको प्रयोग, समुदाय–आधारित पर्यटन, पहुँचयोग्य सेवा, र सूचना व्यवस्थापन जस्ता पक्षमा गरिएको सुधारले एकल यात्रुहरूलाई सजिलो, सस्तो र सुरक्षित यात्रा अनुभव दिलाएको छ। साथै, हिमाली क्षेत्र, निकुञ्ज र सांस्कृतिक सम्पदास्थलहरूमा स्थानीय सहभागितालाई प्राथमिकता दिइएको बताइएको छ।
मच बेटर एड्भेन्चर्स का सहसंस्थापक स्याम ब्रुस भन्छन्, “नेपालले एकल यात्रुहरूलाई अद्भुत प्राकृतिक सौन्दर्य, गहिरो आध्यात्मिकता र हार्दिक सत्कार प्रदान गर्छ—चाहे त्यो काठमाडौंका व्यस्त गल्लीहरू हुन् वा हिमाली शान्त स्थलहरू।”
यो सूची विशेषज्ञहरूको सुझाव, ग्राहक अनुभव, सुरक्षा, दिगोपन, पहुंचयोग्यता, र लोकप्रियता जस्ता मापदण्डका आधारमा तयार गरिएको हो।
नेपालको बजेटमैत्री चरित्र पनि प्रमुख कारणहरूमध्ये एक हो—जहाँ सस्तो आवास, सहुलियतपूर्ण प्याकेज र प्रचुर सांस्कृतिक/प्राकृतिक अनुभव उपलब्ध हुने बताइएको छ। सन् २०२५ मा नेपाल भ्रमण गर्न चाहने एकल यात्रुहरूका लागि यो समाचार उत्साहजनक संकेत हो, जसले नेपाललाई अन्तर्राष्ट्रिय पर्यटन नक्सामा थप सशक्त बनाउँदै लैजानेछ।
